Tysdag i vinterferien får ungdommar frå 7. – 10.klasse på Hellesylt moglegheit til å samle seg og spele dataspel i eitt døgn.

Styret i Sunnylven samfunnshus inviterer ungdommane til LAN på ungdomsklubben.

Sunnylven samfunnshus opnar dørene tysdag 20.februar kl. 12.00 og ungdommane kan vere på huset i eit døgn for å spele. Ungdommane må ta med seg eige utstyr til spelinga, medan samfunnshuset organiserer kablar og switch for å forhåpentlegvis sikre god nok internett tilgang.

Ungdommar på klassetrinna som ikkje ønskjer å spele, men vil vere sosiale er også velkomne til arrangementet. Dei får moglegheit til å spele brettspel, airhockey, ha kahoot eller sjå film.

Om ein ikkje klarer å halde seg vakne heile døgnet kan ungdommane ha med seg liggeunderlag og sovepose for ein kvil. Det blir servert pølser med brød sponsa av Ole Ringdal tysdag kveld og frokost onsdag morgon for dei ungdommane som er vakne til det.

Vaksne vil sitte vakt heile døgnet ungdommane er på huset, for å sikre at alt går bra føre seg.

Styret i Sunnylven samfunnshus gler seg til å ønske ungdommane velkomne og håper det blir eit kjekt arrangement. Invitasjon til arrangementet og påmelding vil kome snart.