På årsmøtet i Stranda mållag sa Inge Bjørdal t.v. frå seg attval og fekk gåver og gode ord for innsatsen frå Anders Folkestad.

Stranda mållag har halde årsmøte, og som vanleg blei årets Målpris delt ut under møtet. Målprisen 2025 gjekk til Platina Seafood Marked AS.

Platina Seafood Marked AS er ei bedrift som først og fremst er retta mot den internasjonale marknaden. Men bedrifta er også godt forankra i lokal kultur og lokale tradisjonar, heiter det i grunngjevinga frå mållaget.
-Vi har heldigvis fleire priskandidatar å velje mellom. Denne gongen la vi særleg vekt på at Platina Seafood marknadsfører fleire av produkta sine på nynorsk, som til dømes «burger av aure frå Storfjorden», sa mållagsleiar Anders Folkestad då han gav prisen til dagleg leiar Hanne Siri Drege.
Platina Seafood fekk også eitt års gåvemedlemsskap i organisasjonen Nynorsk Bedriftsforum.

På årsmøtet vart Anders Folkestad attvald som leiar. Med seg i styret har han Kari Anne Kvistad , Martine Rørstad Sand, Nils Einar Ringstad og Liv Marit Hauso.
Ut av styret gjekk Inge Bjørdal. Han vart takka av etter mange år i styret og fekk ros for svært aktiv innsats for Stranda mållag.

På årsmøtet i Stranda mållag fekk Platina Seafood AS målprisen for sin marknadsføring av produkt på nynorsk. Hanne Siri Drege mottok prisen frå Anders Folkestad.