Under festspela i Geiranger markerer Stranda mållag at det i år er 100 år sidan Nynorsk salmebok kom ut.

Markeringa finn stad i Geiranger kyrkje laurdag 27. september klokka 12.00. Stranda mållag har sendt denne informasjonen om markering av jubileet for Nynorsk salmebok.

-I år som i fjor samarbeider vi med Festspela i Geiranger om eit arrangement. I fjor markerte vi at Jon Fosse blei tildelt Nobelprisen i litteratur, og i år markerer vi at det er 100 år sidan Nynorsk salmebok blei utgitt for første gong – eit verk som har sett djupe spor i både kyrkjeliv, språk og musikktradisjon i Noreg. Den nynorske salmeboka fekk svært mykje å seie for nynorsk som kyrkjemål og for nynorsken som samfunnsberande språk.

Dette arrangementet markerer jubileet med salmar, refleksjonar og tonar som speglar både historia og aktualiteten til denne unike salmeskatten. Markeringa er eit samarbeid mellom Stranda Mållag og Festspela i Geiranger. Det er gratis og ope for alle.

Tid og stad

Geiranger kyrkje
Laurdag 27. september klokka 12.00

Medverkande

• Skodje kyrkjekor med dirigent Tom Gontier
• Per Halse, professor ved Høgskulen i Volda
• Synnøve Marie Sætre, nestleiar i Noregs Mållag
• Robert Coates og Gunnar Inge Eide, organistar

-Vi håper på fullsett kyrkje denne laurdagen, -skriv Stranda mållag til slutt