-Påska rommar heile spennet i livet: stillheita, sorga, håpet og den store gleda. I Sunnylven kyrkje ønskjer vi å invitere både bygdefolk og hyttegjestar til fine samlingar gjennom påska.

Av Ann Kristin Langeland

-Om du kjem rett ned frå fjellet med raude kinn og sekk på ryggen, eller ruslar deg opp bakken før eller etter tur på kaffibaren, så er du varmt velkomen, akkurat slik du er.

Langfredag kl. 18.00
Langfredag er dagen for ettertanke, og i kyrkja får du høyre den gripande lidingssoga.
Lesinga vert delt mellom Inghild Storstein, Eirin Syversen og May Britt Frøysa Lyngroth, som fører oss varleg gjennom historia.
Musikken får følgje desse sterke orda. Kantor Gunnar Inge Eide, fiolinist Øyvind Robak, og vokalistane Oddbjørg Stadheim og Kristin Storstein vil gje oss ord og tonar som held oss fast i håpet. Dette blir ei stund der pulsen får falle litt, og tankane får rom til å lande.

1. påskedag kl. 11.00
Så – påskedagen. Dagen då alt snur. Dagen då lyset får siste ordet.
Til høgtidsgudstenesta fyller vi kyrkja med jubel, blomster og glade tonar.
Kantor Gunnar Inge Eide og solist Kristin Storstein står for musikken, medan Liv Brevik er tekstlesar denne festdagen.
Her skal vi synge dei fantastiske påskesalmane og vi skal få høyre den gode påskebodskapen som har bore generasjonar før oss: Livet er sterkare enn døden. Lyset er sterkare enn mørket. Håpet er sterkare enn alt som bryt ned.
Ann Kristin Langeland er liturg begge dagane.
Enten du er heime i bygda, på påskeferie i fjellet eller berre kjenner at du treng eit lite pusterom midt i høgtida – vi ønskjer deg hjarteleg velkomen til fellesskapet i Sunnylven kyrkje.
Her er det rom for alle. Her kan du kome som du er.
Og kanskje får du med deg noko godt å bere vidare inn i dei siste påskedagane.

(Og sidan YR melder unormalt godt kyrkjeføre, er det ingen grunn til ikkje å ta turen.)