Kristina Farstad Bjørdal er festivalsjef for Aalesund Folk Festival som startar 10 september.

I over eitt år har Kristina Farstad Bjørdal og fleire planlagt Aalesund Folk Festival. Den opnar 10. september og varer i fire dagar.

-Vi har jobba med dette lenge så det blir veldig kjekt å kome i gong, seier Kristina Farstad Bjørdal. Ho og fleire har jobba fram ein spanande festival med kjende norske folkemusikarar. På lista finn vi namn som Jo Asgeir Lie, Jorun Marie Kvernberg, Carl Petter Opsahl, Britt Elise Skram, og Knut Ivar Bøe for å nemne nokre.

Festivalen opnar torsdag 10. september og varer fram til og med søndag 13. september.
Dei fleste arrangementa er samla i og rundt Molovegen, med Thon Hotel og Fabrikken Kulturscene som hovedarenaer. Men det blir også festkonsert og introkonsert i Parken kulturhus og andre stader i Aalesund.

Og det blir stor satsing for born, dei får ein viktig plass i den fyrste festivalen, skriv Kristina. Mellom anna blir det gratis introkonsert i Parken kulturhus 12. september i lag med profesjonelle musikarar og dansarar som stiller på saman med Fjord Cadenza. Og på søndag blir det Superkappleik.

Gjennom helga blir det mykje dans med musikk av Kvarts, Thorud/Rudi og fleire grupper og spelemannslag som vil sørge for flotte tonar.
Kristina Farstad Bjørdal skriv at den fyrste Aalesund Folk Festival blir avslutta på søndag med gudsteneste i Ålesund kyrkje der presten og jassmusikar Carl Petter Opsahl, og Kvarts er med.

Fullstendig program og billettar finn ein på aalesundfolkfestival.no